حل حمدي خليفة المحامي بالنقض ونقيب المحاميين السابق والمرشح على مقعد نقيب المحاميين ضيفًا على الإعلامي هيثم بسام في برنامجه ورقة في ملف عبر شاشة قناة النهار للحديث عن تفاصيل برنامجه الإنتخابي.
وقال حمدي خليفة عن ترشحه لمقعد نقيب المحاميين: الإنتخابات لم ولن تقف عند حد معين والمسألة كلها بتدور حول إرادة الجمعية العمومية وعدد الناخبين فأي كان العدد المرشح ليس قاسم مشترك في أصوات المحاميين واللي منتظرينه من الجمعية العمومية التعبير عن رغبتها.
أما عن برنامجه الإنتخابي فقال حمدي خليفة: البرنامج الإنتخابي بالنسبة لي مبيقفش عند حد معين، يعني أنا دائمًا ممكن كل فترة زمنية أحدث برنامجي الإنتخابي وأنا كان عندي برنامج إنتخابي سنة 2009 نفذت جزء كبير منه وبقيته متنفذش لأنه صدر حكم بعد دستورية القانون فالدورة لم تكتمل
وتابع: وكان من أهم النقاط في البرنامج الانتخابي اللي نفذته في 2009 أني حصلت على قطع أراضي على مستوى مصر كلها عبارة عن 20 قطعة أرض عبارة عن مدن سكنية وأندية رياضية كنت واخد المتر في المدن السكنية بـ 70 جنيه وفي الأندية الرياضية بـ 1 واحد للمتر وقبل 2009 كنت عامل مدينة سكينة ونادي رياضي وإجتماعي كبير.
وأردف حمدي خليفة: سيتم بناء 20 مستشفى في برنامجي الإنتخابي وفي 2009 كنت حريص على تخصيص الأراضي لأني مكنتش معتبر أنها مدن سكنية وأندية رياضية بل كنت واضع في الإعتبار أن كل قطعة أرض هبني عليها مستشفى يعني 20 مستشفى على مستوى المحافظات بالكامل طبعًا مكنتش هقدر أدير كل هذه المستشفيات وكنت هستعين بأحد الشركات اللي بتقوم بإدارة المستشفيات وحق الانتفاع اللي باخده من الشركة دي كان مقابل علاج المحاميين مجانًا يبقى أنا وفرت للمحامي وأسرته العلاج مجانًا ووفرت دعم سنوي للعلاج المفروض بيتم سداده من النقابة العامة بـ 800 مليون جنيه سنويًا.
وأضاف: الـ 800 مليون جنيه المفروض أوظفهم بأني أزود بيهم المعاشات ومش هزود بالمبلغ ده لوحده لأن عندي برضوا مسألة وحسبة تانية ووجدت أن مباني المستشفيات مش هتكلف دعم سنة واحدة يعني مش هيتكلفوا 800 مليون جنيه يعني أنا وفرت على المحامي أنه يدفع مبالغ للعلاج ووفرت على النقابة أنها تدفع دعم سنوي بعد كده، يعني هو دعم سنة واحدة بس هاخده هبني بيه أبنية المستشفيات والدعم في السنوات التالية هزود بيه المعاشات.
وأستطرد المحامي حمدي خليفة: يبقى أنا حليت مشكلة العلاج من جذورها أنا مبعرفش العمل المسكن أو المؤقت أو أن أنا أقعد علشان أوقع على كارنيه أو علاج أو معاشات كل الأمور دي أنا هسندها للنقابات الفرعية بحيث أن النقابات الفرعية هيكون لها صلاحية النقابة العامة للعلاج والمعاشات والكارنيهات والنقابة العامة أنا بوظفها للمشروعات الكبرى فقط لا غير فلما نرجع لمشروع العلاج وأنا أبني 20 مستشفى السنة دي أو السنة اللي جاي أيًا كان الوقت اللي إتبنوا فيه أنا كده بحل مشكلة العلاج من جذورها كده هنلغي المشروع العلاجي ولا النقابة هتدفع دعم ولا المحامي هيدفع مقابل علاج.
الجدير بالذكر أن الإعلامي هيثم بسّام يقدم برنامج ورقة في ملف عبر شاشة قناة النهار ويذاع البرنامج يوم الخميس من كل أسبوع في تمام الساعة الرابعة عصرًا.
