حرص أحمد فتحي لاعب النادي الأهلي السابق ، و نادي بيراميدز الحالي، علي توجيه رسالة وداع مؤثرة لجماهير القلعة الحمراء، قبل رحيله بشكل رسمي الي نادي بيراميدز.
وكتب فتحي عبر صفحته الشخصية على موقع التواصل الاجتماعي “إنستجرام” : “لحظات يصعب فيها الكلام.. لحظات يصعب فيها التعبير.. خاصة وأنت بتخاطب أطراف كلها عزيزة عليك، ولها مكانة خاصة فى قلبك، وكمان عشت معاهم أحلى 12 سنة فى حياتى، 12 سنة كلها إنتصارات وبطولات وأفراح”.
و أضاف:”عايز أقول لو عقود الأحتراف المكتوبة بتنتهى.. عقود الحب والود والإحترام بينى وبين كل منظومة النادى الأهلى لن تنتهى”.
وتابع: “أعذرونى لحظات قاسية وأى قسوة وأنت تغادر حبايبك اللى قضيت معاهم سنين فى النادي الأهلى، بيتى وهيفضل بيتى، حتى لو كان القدر كتب لى خطوة جديدة”.
و تابع:” هيفضل جمهور الأهلي اللى حبنى وساعدني ووقف جنبى هيفضل سندى، لأنه جمهور وفى، جمهور أصيل.. ربنا يشهد إنني لم أقصر لحظة لا فى حق النادى ولا حق جمهوره.. وبذلت أقصى ما أملك حتى آخر لحظة، وأتمنى أكون قدمت ولو جزء من اللى يستحقه الأهلى وجمهوره”.
وأستكمل: “فى هذه اللحظه الصعبة على نفسي، عايز أسجل شكري للنادي الأهلي وإدارته وعلى رأسها المحترم الكابتن محمود الخطيب.. وكل الشكر للجماهير اللي مهما تكلمت مش هقدر أعطيها حقها، شكرًا لكل المدربين اللى ساعدوني من أول يوم وحتى أخر لحظة.. والشكر لكل زمايلي اللعيبة، اللى أنا لعبت معاهم على مدار كل الأجيال.. شكرًا لأخواتي الأطباء ومساعدينهم أخصائيين التأهيل والمدلكين.. شكرًا للإداريين والعمال.. شكرًا لكل فرد ساعدنى ولو بأى حاجة”.
واختتم: “أنا مش عايز حد يزعل منى.. فى الأول والآخر دى خطوات كتبها ربنا سبحانه وتعالى.. وأنا متوكل على الله فى كل خطواتي.. ودايمآ هيفضل الأهلي وجمهوره فى قلبى”
