أعرب أكرم ابن الفنان محمود البزاوى عن استيائه من حذف والده من “أفيش” فيلم “كازابلانكا”.
وكتب عبر حسابه على “فيسبوك”: “مبدئيا أبويا ماعندوش أى فكرة عن البوست ده.. أنا أبويا طيب ويمكن طيبته دى هى اللى كانت سبب فى تأخير نجاحه وأنه كتب من الباطن كتير مثلا زى ما قولت قبل كده وكان دايما بيعمل حاجات وتنجح ومفيش حد يعرف أنه لى دور فى نجاح العمل ده بس اللى كان بيصبره أن ربنا هيعوض”.
وأضاف: “وبعد ما قدر يوصل بدراعه للى هو فيه لسه فى ناس مش مقتنعه به.. بس ده حقهم لأن مفيش حد عليه اجماع بس طالما مش مقتنع بحد يبقى ماتحرجوش وأبعد عنه أحسن لأنه فى نظرك مش الشخص اللى يفيد.. فى رأى الشخصى ناس كتير بتعرف تتصور بس مش الكل بيعرف يمثل.. وأسف لو كنت منحاز أوى فى كلامى لأبويا بس زى ما قولت ده أبويا اللى نجاحه بيسعدنى أكتر ما بيسعدنى نجاحى.. ملحوظة: أبويا قالى إنه عامل دور مهم فى الفيلم ده.. ويمكن بيكدب عليا وطالع كومبارس.. ساعتها هتأسف على البوست”.
وبمجرد ما نشر أكرم “البوست” أعرب الكثيرون عن حبهم لمحمود البزاوى وأنه من أكثر الممثلين الموهوبين في مصر.
رد الفنان صلاح عبدالله قائلا: “تعرف يا واد يامكرم أنا بحب حبك لأبوك قوى قوى ومعجب بيه لأقصى درجة وبدعيلك وبدعيله وأبوك استحمل كتير وربنا كبير، والحمدلله فى الفترة الأخيرة كل الناس بتشاور بكل التقدير والاحترام والإجلال لمحمود البزاوى واللى جاى أحلى وأعظم بإذن الله بغض النظر عن الأفيش”.
وقال الفنان صبرى الفواز: “يا أكرم أبوك فنان كبير.. حقك تفرح وتفخر بيه .. وإحنا زملاؤه بنفخر بيه وبشغله”.
وأكد الفنان أحمد السعدنى: “مش بالافيشات يا ابنى أبوك ممثل وأب وإنسان عظيم”.
محمود البزاوى
أما الفنانة مى كساب فقالت: “واد يا مكرم ما تنكدش على أبوك مش بالافيشات”.
