شهيرة تحكي تفاصيل المشهد الأخير لمحمود ياسين معها وتكشف سر رؤيا ختم القرآن

كتبت – آية أبوالدهب :

عبرت الفنانة شهيرة عن نيتها للعودة للتمثيل مرة أخرى بعد انقطاع طويل بسبب رعايتها لزوجها الفنان الراحل محمود ياسين.

وقالت شهيرة في لقائها مع الإعلامي عمرو الليثي في واحد من الناس على الحياة نفسي أرجع لشغلي تاني وأنا جالي عرض اليومين اللي فاتوا دول لأن قبل كده كان بيجيلي وكنت بعتذر علشان محمود وبعدين لما جالي قلت إيه الحظ ده لأن ده كان هيلهيني شوية لأني بحب شغلي أوي كموهبة، وكان نفسي الظروف تبقى مهيئة لكن مش في وجود كورونا ولو ربنا كاتب إني أرجع نفسي أعمل حاجات مهمة وأعبر عن قضايا كتير.

وكشفت الفنانة شهيرة سر اعتذار الفنان محمود ياسين عن الجزء الثاني لفيلم الجزيرة قائلة لما حبوا يعملوا الجزيرة 2 المخرج شريف عرفة كلمه علشان يبقى معاهم فقال له معاكم إزاي الشخصية ماتت فقال له انت وافق بس ما ينفعش الجزيرة من غيرك كان هيخلي مثلًا الابن يشوف أبوه في اليقظة إنه بيقول له اعمل كذا وكذا المهم هو اعتذر وقال لي أنا زعلت زعل منه فقلت ليه وقعدت ألومه طول الليل إنه اعتذر.

وعن علاقته بالقرآن الكريم قالت مرة شاف رؤيا من سنين قال لي لقيت حد بيخبط على كتفي بيقول لي يا محمود فصحيت قال لي اقرأ القرآن خمسين فقال لي هل أبص في المصحف أشوف السورة 50 دي إيه ولا أقرأ القرآن 50 مرة فقلت له أنت حاسس بإيه، فقال لي حاسس إني لازم أختمه خمسين مرة، وفعلًا عمل كده.

وسردت الفنانة شهيرة المشهد الأخير لمحمد ياسين معها، حيث قالت كان بدأ الأجهزة كلها تضعف وأنا للأسف ما حضرتش الأربع أيام الأخيرة لأن جت لي نزلة شعبية والدكاترة قالوا لي ما تجيش وقبل الأربع أيام دول كانوا بيقولوا لي الأكسجين بينزل والضغط وخلافه لكنه كان في حالة ذهنية ووعي عالي جدًا لدرجة قولنا ده خف يعني.

وتابعت :” لقيت عمرو بيكلمني وبيقول لي أبويا رجعلي تاني أول ما دخلت عليه لقيته بيقول لي إزيك يا عمورة وقال لي أنا كويس جدًا وكلمني وقال لي خدي كلميه فقلت له إزيك يا محمود قال لي إزيك يا روح قلبي قلت له عارف مين اللي بيكلمك قال لي كده برده فقلت له علشان صوتي متغير لأني عندي برد قال لي خلي بالك من نفسك قلت له المهم أنت كويس قال لي أنا كويس جدًا، وده بالنسبة لي كان آخر مشهد”.