أيمن نور الدين يكتب.. جيهان فاضل تعتزل الأضواء للعمل فى سوبر ماركت صغير
اعتزلت الفنانة جيهان فاضل وقررت أن تقف فى سوبر ماركت تبيع بداخلة جبنة وزيتون ورنجة وو اسمه طيبة وهو سوبر ماركت صغير فى مدينه كالجاري في مقاطعه البيرتا فى كندا وبتصرف منه على ولادها التلاتة من غير ماتمد ايديها لحد وتشحت او تستسهل اى طريق تانى
وقبله كانت شغالة فى مطعم أكلات مصرية بيبيع فول وطعمية فى كندا جيهان ودعت الشهرة والنجومية والبريق وزهدت فى أشياء كثيرة فى الحياة وبدات من الصفر من جديد وتعيش حياتها كابسط انسانة .. تعمل معظم يومها بأجر زهيد
وكان آخر اعمالها الفنية مسلسل تحت السيطرة مع نيللى كريم ومن بعدها هاجرت مع عيالها و بعدت عن كل الناس اللى بتعرفهم وقطعت علاقتها بناس كتيرة من الوسط الفنى
وكتير من اصدقائها فاكرينها ثرية وعايشه حياة الترف خارج مصر
وبتبقى واقفه بتبيع فى السوبر ماركت وتتمنى ان مافيش حد يعرفها او يبدى استغرابه ليها .. انها اتحولت من فنانة شهيرة اكتشفها خيرى بشارة فى فيلم ايس كريم فى جليم مع عمرو دياب بعد تخرجها من الجامعة الأمريكية
ومن حسن الحظ جيهان مابتقلعش الكمامة فى السوبر ماركت عشان الكورونا وكتير زبائن مصريين وعرب بيشتروا و مابيعرفوهاش
جيهان فاضل .. اختلفنا معاها سياسيا كتيرا لما كانت بتأيد الثورة بطريقة متطرفة وبتصرح تصريحات غير مسئولة ..وكتير هاجمتها .. لكن على المستوى الانسانى انا بحترمها كثيرا
وبصراحة شديدة فيه فنانين كتيرا دخلوا فى لعبة السياسة واتحرقوا منها وخسروا كتير وندموا على كده ومنهم جيهان فاضل .
