“بقينا خالصين” أحمد السقا يعتذر لتامر حسني

كتبت:مروة بدار

رد الفنان أحمد السقا على رسالة الفنان تامر حسني التي وجهها له، لعتابه على تصريحاته في برنامج “السيرة” مع الإعلامية وفاء الكيلاني.

اعتذر السقا لتامر عبر حسابه على الفيس بوك، كاتبا: “رسالة إلى صديق عزيز.. صديقى وأخى العزيز تامر حسنى.. أنت عارف اللى بينى وبينك عيش وملح وحاجات كتير، قد أكون أخطأت إنى اتكلمت في الموضوع ع الهوا ولكن يعلم الله كم كنت مجروحا وكم كنت حزينا”.

تابع: “مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسنى إحنا اللى بينا كتير متزعلش يا عم وحقك عليّ.. وميعادنا الحفلة اللى جاية.. أحمد السقا”.

الجدير بالذكر كان الفنان أحمد السقا قد كشف أسباب غضبه من الفنان تامر حسني، على خلفية تعاونهما سويا في فيلم “الفلوس”، الذي عرض نهاية العام الماضي.

أوضح السقا خلال حواره مع الإعلامية وفاء الكيلاني ببرنامج “السيرة” المذاع على قناتي أبو ظبي وdmc، أنه غاضب من تامر ولم يخبره بهذا الأمر حتى الآن، قائلا: “أنا زعلان من تامر حسني ولحد الآن مقولتلوش إنه أنا زعلان منه.. ودي أول مرة أقول رغم أني بحبه جدا.. ولو مش بحبه مش هزعل منه”.

أشار السقا إلى أنه عندما طلب منه تامر أن يظهر كضيف شرف في الفيلم وافق على الفور، فقد سبق وأن ظهر معه كضيف شرف في مسلسل “ولد الغلابة”، لافتا إلى أنه فوجئ باسمه في دعايا فيلم “الفلوس” وكأنه مشارك في البطولة، بل إن الاسم كان موجودا على بعض الأفيشات، مضيفا: “كلمته .. مرة قالي دول فانز ومرة قالي دي الشركة المنتجة، قولتله أنا معرفش الشركة ومعرفش حد غيرك وميصحش.. ودي أثرت عليا نفسيا وأثرت عليا في شغلي”.

تابع: “لو تامر قابلني دلوقت وقالي كلمتين حلوين خلاص هنتصافى.. بس زعلت لأنه ميصحش يعمل فيا كده.. هو كان بإيده يمنع الكلام ده بس واضح انه كان مشغول.. أو ممكن يكون عداها.. وأنا مسامحك يا عم تامر”.

كما رد تامر حسني على ما قاله السقا، وذلك من خلال خاصية القصص القصيرة في حسابه على الانستجرام.

كتب تامر: “حبيبي وأخويا وصديق العمر و

نجم الدنيا كلها أحمد السقا، كنت أتمنى أنك تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام دا هنا بس علشان بعد كلامك في التليفزيون الجمهور الكريم بقى ليه حق أنه يفهم الصح”.

تابع” علشان أفكرك بس، أنت كلمتني وقولتلي في خبر في موقع وعليه صورة افتراضية للفيلم وكاتبين أن بطل في الفيلم وأنا رديت عليك أن دي اجتهادات صحفية والصورة من تصميم المحبين اللي أكيد فرحوا بالخبر أننا مع بعض، حتى مقولتش أن دي الشركة المنتجة لأنها شركة كبيرة ولا يمكن تعمل كده لأن الفيلم متباع للخارج والداخل باسم أخوك تامر حسني، وأصلا أفيش الفيلم الرسمي نزل والناس كلها شافته وأنت مش فيه ولا فيه اسمك وكل الأبطال طالعين مرسومين معرفش زعلك من إيه الحقيقة، كان ممكن تزعل لو الكلام دا نزل على صفحتي”.

أكمل: “وأنا شرحتلك ده من سنة واتكلمنا بعدها مرتين مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد”.

أضاف: “أخيرا بقى مستحيل الشركة تروج وأنا أفوت أو اسمح باستخدام اسمك كبطل في الفيلم وأنت مش فيه لأن دا هيعود علينا كلنا بالضرر لأن الناس هتدخل الفيلم مش هيلاقوا الكلام دا فهيبقى احنا كده بنضحك على الناس وضرينا الفيلم ولأن أكيد يشرفني أن احنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلا، وبعدين يا حج أحمد لما أنا جيتلك مسلسلك حصل اجتهادات كتير من محبينك الكرام شوية يقولوا المسلسل بطولتنا وشوية يقولوا دا ضيف شرف بس وأنت عارف أن عمري ما عملتها وطلعت ضيف شرف غير ليك”.

تابع: “دا أنت طلبتني أجي اصور الساعة 8 الصبح كنت عندك في نص ساعة علشام فكرة طلعت في دماغك فجأة وجيت لأنك غالي عندي أوي أوي فوق ما تتصور، وكنت بفرح باجتهادات محبينك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لأني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا”.

اختتم كلامه: “أنت حبيبي يا أحمد وصديق عمر علشان كدا أنا اللي مش هزعل منك معلش طولت في الكلام لأن برضو زعلك يعز عليا”.