قال الرئيس عبد الفتاح السيسى، إنه تحدث عن سعر رغيف العيش لأنه يتصدى لقضايا ومشاكل لا يمكن أن تستمر، مضيفًا: “أتصدى لقضايا واستفيد من فرص بنعرض فيها حاجات زى كده واتكلم، وأنه حال غير قابل للاستمرار والنجاح للدولة”.
وأوضح الرئيس السيسى، خلال كلمته فى افتتاح مشروعات سكنية متنوعة فى مدينة بدر، اليوم السبت: “لما اتعدل سعر رغيف العيش كان بـ 5 قروش وهو بيتكلف 18 قرشا.. وفضل 5 قروش بقى 65 قرشا.. الدعم كان بيتقدم لـ 30 مليون إنسان من 30 سنة.. ودلوقتى حوالى 60-70 مليون”.
وأضاف: “النمو السكانى زاد وقيمة السلعة زادت وحجم المستفيدين زادوا.. ده كلام نقدر نستمر فيه على طول.. وكمان لما نبقى 120 مليون أو 150 مليون.. أنا مش هبقى موجود فى الوقت ده.. الأمانة إننا نفهم ايه بيحصل.. وأتعامل معاه وكأنه حصل.. ولو أنا قولت أنا مش هكون موجود فى الوقت ده.. وكانت شايف اللى بيحصل للبلد دى بالطريقة اللى ماشيين بها دى.. وربنا يسألنى كنت فاهم وساكت ليه وكنت عاوز استمر على الكرسى.. ربنا هيقولى الكرسى ده اللى جبتك فيه وأنا اللى همشيك منه.. مالك الملك يؤتى الملك من يشاء وينزع الملك ممن يشاء.. محدش بيجيب حد ومحدش بيمشى حد.. طب أنت عملت كده ليه هقوله إيه ساعتها.. الأمانة تقتضى التصدى للمشاكل وحلها.. ودى فرصة أننا نشوف ده”.
وتابع: برنامج الدولة فى رفع الكفاءة وتحسين أحوال الناس مستمر.. مستقبل البلاد مش كلام.. والجهد مستمر لأن حجم المطلوب ضخم.. وبندخل من مكان إلى مكان وبنحسن ده وده.. كان لا بد أن نطور البلد ومش بالكلام.. ده جهد وعرق وتضحية علشان الأجيال الصغيرة تعيش ويكون لها مستقبل”.
