“يا بخت من ضحكنى بس” حفلة ستاند أب كوميدي بساقية الصاوي

“ستاند أب كوميدي” تشعل مسرح ساقيه الصاوي بحفلها المتميز من جديد

كتبت:مروة بدار

 

جيل فريد من نوعه عاد من جديد علي خشبة مسرح النهر استقبلته ساقية عبدالمنعم الصاوي حفل ستاند أب كوميدي جديد بعنوان “يا بخت من ضحكني بس”.

كما أن حفلة ستاند أب كوميدي يقدمها مجموعة من أفضل الفنانين الكوميديين الممارسين لفن الستاند كوميدي منذ أكثر من ٤ سنين كوميديانز لأول مرة في حفلة واحدة.

كما يذكر أن ستاند أب يؤدي الفنان الكوميدي مباشرة أمام جمهور حيّ وهو يلقي النكت ويتحدث عن مواضيع اخرى بصورة ساخرة ومضحكة، وعادة مايتفاعل المؤدي مع جمهوره ويشركهم في أداءه، يؤدي الكوميديون هذا النوع من العروض في النوادي الكوميدية، النوادي الليلية، الجامعات والمسارح، يُطلق على مؤدي الستاند أب كوميدي تسمية: كوميديان أو ستاند أب كوميديان.

وهي حفلة مختلفة عن أي حفلة ستاند أب كوميدي تانية وعن الكوميديانز نفسهم، يقدمها مجموعه من الكوميديانز من إسكندريه ويشعلون مسرح النهر وهم(شروق ايمن، روماريو أنطون، حمزة بهاء، يوسف عماد، وليد التركي، احمد منصور، يوسف أحمد).

ويستعرض معكم موقعنا«صوت العرب نيوز» حواراً خاصاً مع شباب ستاند أب كوميدي وبسؤال:

«يوسف أحمد»

ماهي بداية مشوارك في ستاند أب كوميدي؟

بدايتي كانت في ٢٠١٤ في الاستاند اب كوميدي في اسكندرية رغم ان فن الاستاند اب كوميدي مكنش معروف في اسكندرية و اشتغلت علي انه يوصل للناس في اسكندرية.

هل واجهتك صعوبات في ستاند أب؟

من اوحش الصعوبات الاوجهت ستاند أب أن زمان الجمهور مكنش فاهم الاستاند اب كوميدي.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

بعد مرور اليوم وتشجيع الجمهور وإنبهرهم بينا حمسني جدا للحفله القادمة و أعملها بسرعه كمان و الحفله هتكون في اسكندرية وهتكون اكبر من دي، ومش اول مره في الساقيه دي تلت مرة.

من وجهة نظرك تفضل المسرح أم السينما ولماذا؟

انا بحب السينما لانها هدفي من الاول والمسرح سلم للسينما عشان اللي يقف علي مسرح و سط جمهور و ينجح يقدر يعمل اي حاجه.

من وجهة نظرك كيف تري الفن؟

من وجهة نظري أن الفن متعه و تخريج طاقه.

من هو مثلك الاعلي في التمثيل؟ لو اتعرض عليك دور كوميدي ف السينما هل توافق؟

مثلي الاعلي في التمثيل طبعا الزعيم عادل امام، اما لو اتعرض عليا دور هوافق طبعا لا دا حلمي وانا بحب التمثيل جدا.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

الجمهور يتعامل معاك علي انك صحابه، اخوه بيحبك و بيحب يخدمك في اي حاجه تحتاجها كأنه عيلتك.

هل تهتم بالسوشيال ميديا؟

طبعا جدا لانها المنصه الاساسيه وأقرب للجمهور والتعامل معهم ومحتوي مهم ف الوقت الحالي.

ماطبيعة الشخصية التي تجسدها؟ طبيعة شخصيتي اكتر من شخصيه علي حسب الاسكربت وتختلف كل مرة عن التانيه.

كيف تستعد للشخصية التي تجسدها في ستاند أب؟

علي حسب الاسكريبت المكتوب واستعدتها واختلاف الشخصيات وكيفيه التعامل معاها.

ما جديدك في الفتره القادمه في ستاند أب؟ هل تحدث تطورات جديده في ستاند أب؟

بحضر للفتره القادمه وحفله في إسكندريه والتليفزيون باذن الله.

ما الذي تغير في شخصيتك منذ بداية مشوارك في أستاند أب؟

مفيش حاجه اتغيرت في شخصيتي بس بحاول أطور من نفسي وأكون احسن.

ما المحطه التي تعتبرها فارقه في مشوارك رغم نجاحات الكثيره؟

اكتر محطه هتفرق معايا هي التليفزيون باذن الله قريب.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

بعد أزمه كورونا وتاثيرها علينا بحاول أشتغل عشان اعوض الفتره اللي فاتت من حفلات.

«شروق أيمن»

ماهي بداية مشوارك في ستاند أب كوميدي؟

بدايتي كانت في ٢٠١٦ مع علي قنديل.

هل واجهتك صعوبات في ستاند أب؟

اه للاسف وجهتني صعوبات لان كان شغفي التمثيل فسبته ورجعتله النهارده اول مره.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

بعد رد فعل الجمهور اليوم وحماسمهم حسيت اني مبسوطه اني رجعت و ان لسه في احسن من كده اقدمه بعد الحفله دي.

من وجهة نظرك تفضل المسرح أم السينما ولماذا؟

وجهة نظري بفضل السينما اكتر لانها بتعيش طول العمر.

من هو مثلك الاعلي في التمثيل؟

مثلي الاعلي هي شاديه لانها متنوعه جدا.

لو اتعرض عليك دور كوميدي ف السينما هل توافق؟

عملت ادوار كوميدي بالفعل.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

كان في ناس مبسوطه و اتبسطت انهم اتبسطوا لكن انا عادة بحب اني اخد النقد اكتر عشان اطور نفسي.

هل تهتم بالسوشيال ميديا؟

اه طبعا مهتمه بالسوشيال ميديا لانها اقرب كمان للجمهور ومحتوي مفيد ليا جدا.

ماطبيعة الشخصية التي تجسدها؟

طبيعة الشخصيه هي شخصيتي وطبيعتي مش بطلع المسرح غير بشخصيتي.

كيف تستعد للشخصية التي تجسدها في ستاند أب؟

لما بستعد بفكر في الحاجه اللي تمسني و اقدر ارتجل و اتكلم فيها.

ما جديدك في الفتره القادمه في ستاند أب؟ هل تحدث تطورات جديده في ستاند أب؟

لسه مفيش حفلات قادمه لكن اكيد هرجع بحجات اقوي و احسن الفتره الجايه.

ما الذي تغير في شخصيتك منذ بداية مشوارك في ستاند أب؟

تغير كتير منهم بقيت مبخافش اكتر و بتكلم عادي في حياتي و اجرا في حياتي.

ما المحطه التي تعتبرها فارقه في مشوارك رغم نجاحات الكثيره؟

عندما اسست مسرح جامعتي لان مكانش فيها مسرح دي اكبر نجاح.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

 ايوه اكيد حضرت ماتريالات كتير هقدمها في الحفلات القادمة.

«يوسف عماد»

ماهي بداية مشوارك في ستاند أب كوميدي؟

بدايتي كانت في الجامعه في ستاند اكتفدي بدأت أطلع لوحدي وبعد كدا دخلت ورشه علي قنديل وبعد كدا بدأنا نعمل حفلات لوحدنا.

هل واجهتك صعوبات في ستاند أب؟

طبعا وجهتني صعوبات في ان افهم الناس وافهم واتكلم ازاي واعمل أي، كانوا في الاول طبعا الجامعه مع الورش وكانوا بيدربونا ومواعيد بردو الحفلات ومع الامتحانات وكانت بتبقي صعب شويه.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

شعوري ان مبسوط جدا وانا بقالي 3 سنين مش بعمل ستاند كوميدي بسبب ظروف شغلي وطبعا مبسوط وأنا شخصياً راجع بطريق قويه وكويسه الحمدلله، أما احنا معظم حفلاتنا في الساقيه.

من وجهة نظرك تفضل المسرح أم السينما ولماذا؟

انا مشتغلتش مسرح قبل كدا الصراحه ممكن أكون حابب السينما أكتر والاتنين سواء السينما اوالمسرح ليهم مميزات وعيوب بس وانا بحب السينما أكتر وبذات الافلام والسيناريوهات والحوار والاخراج اما المسرح عاوز مجهود أقوي وحك أكتر وطريقه معينه.

من وجهة نظرك كيف تري الفن؟

فن ستاند كوميدي فن جميل وحلو وكل حاجه بس هو للاسف ممكن تكون ف مشكله ف مصران كل واحد شايف الموضوع من وجهة نظره مفيش حاجه ماشين عليها ومفيش مكان يجمع الناس كلها دي مشكلتي معايا والفن جميل جدا بيعبر المشاكل والنقد الساخر الا بتعمله والحاجات الا بتنتقدها بشكل جميل وبنضحك الناس وعلي الرغم من المشاكل الا بتواجهم يوميا بس بيضحكوا علينا في الأخر.

من هو مثلك الاعلي في التمثيل؟

مثلي الاعلي في التمثيل من القديم فؤاد المهندس أما الحديث بحب أحمد حلمي.

لو اتعرض عليك دور كوميدي ف السينما هل توافق؟

طبعا هوافق ودا حلمي وبحب السينما والتمثيل.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

بكون مبسوط طبعا بيهم ولما حد بيكون بيتصور معايا ويقعد يقولي إفهاتي لما أقبلهم مره تانيه ويذكروني بإفهاتي ويسالوني عنها بحب الكلام دا جدا وانهم متذكرين ليا حاجات وبحب اتصور معاهم وبحبهم.

هل تهتم بالسوشيال ميديا؟

اه الي حد ما طبعا وهي الا منتشره جدا دلوقتي.

ماطبيعة الشخصية التي تجسدها؟

هو مفيش شخصيه معينه وهو بيبقي عباره عن مواقف بنتخيلها زي مثلا(صنايعي _ مدير _ وزير _ عمي _ خالي _ أمي _ والدي _ أختي وغيرهم) وتختلف الشخصيات كل مرة.

هل تحدث تطورات جديده في ستاند أب؟

اتطورت كتير جدا من حيث بقيت متحدث كتير جدا وبتكلم أكتر وبوصل المعلومه أسرع وأسهل وبقيت بعرف اتكلم مع الناس.

ما المحطه التي تعتبرها فارقه في مشوارك رغم نجاحات الكثيره؟

كانت أول حفله عملناها لوحدنا بعد علي قنديل بدأنا نشتغل لوحدنا بالنسبالنا وقتها كانت أول حفله نعملها لوحدنا وكانت حاجه كبيره بالنسبه لينا وقتها بس دلوقت بقيت حاجه طبيعيه.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

اه طبعا نتمني لو في حاجه أحسن ولو في أفكار أكتر وأفضل وأكيد هنبسط بيها.

«روماريو أنطون»

ماهي بداية مشوارك في ستاند أب كوميدي؟

بدأت من 2013 عملت حفله في التانيه في التالته وبعد كدا كنت حابب اطور من نفسي واعرف عن الفن اكتر لان كنت بعمله بالفطرة مكنش عندي أسس او قواعد له، وبدأت اخد ورشة ستاند اب كوميدي مع علي قنديل والحمد لله كنت من الناس الا نجحت ف الورشة وعملنا حفلة باننا هنتخرج من الورشة دي وكانت في ساقية الصاوي والفيدباك كان حلو جدا الحمد لله بعد كدا بدأت اعمل ف ساقيه الصاوي حفلات وفي جامعات وعملت برا مصر في الإمارات مع كوميدي سنترال، وعملنا حفله ف دبي وعملت برنامج برضو مع كوميدي سنترال اسمه كوميدي علي الواقف سيزون 2 كان بيضم 30 واحد من كل الوطن العربي والحمد لله انا كنت من التسعه الا طلعوا من مصر.

هل واجهتك صعوبات في ستاند أب؟

المشاكل والصعوبات في الستاند اب كوميدي يعني الفكرة ان الفن مش منتشر اووي دا طبعا بيخلي من عندنا البوش اننا نكمل في دا ولكن مع ذلك احنا بنكمل وان شاء الله الفن دا هينتشر جدا وبالفعل الفن دا الناس بدأت تاخد بالها منه وبدأت تتكلم عنه في البرامج وفي التي في شوز وكدا وربنا كريم يعني، والفكره بس ان احنا شعب مصري، وان الشعب المصري مقتنع انه دمه خفيف جدا ف ان انت تضحك الشعب المصري دا من أصعب الشعوب ال ممكن تضحك منك ف العالم يعني انا يمكن عملت برا مصر فبقول كدا برا الضحك سهل بكتير عن هنا.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

مش اول مره ليا طبعا ف ساقيه الصاوي وشعوري ايه دايما ف كل حفله حتي لو انا بقالي 100سنه بعمل ستاند اب كوميدي انا كل حفله بيبقي عندي الخوف الا هو قبل خوف المرضي الا بيساعدك تعمل احسن حاجه عندك، طبعا لما بنجح في فرحه جميلة وكل مره بجيب افيه بيجيب بيبقي ليه الفرحة بتاعته اللحظيه انت مش بتستني اما ينزل ع النت فتشوف الفيدباك لا انت بتاخد الفيدباك حالا اذا كنت انت حلو او وحش والناس مش هتجامل الناس دافعه فلوس وتيكت عشان تشوف مش هتضحك بالعافيه عشان انت بتضحكهم وهما ما يعرفكش وانت متعرفهمش فدا شي حلو جدا وبيبسطنا جدا يعني.

من وجهة نظرك تفضل المسرح أم السينما ولماذا؟

دا ليه حلاوته ودا ليه حلاوته يعني المسرح اي فن مسرح عموما الميزة فيه انك بتاخد حقك وانتي واقفه قولتي افيه الناس بتضحك قولتي حاجه تعيط فالناس هتعيط حالا برضو وطبعا فن صعب المسرح دا بيتقال عليه ابو الفنون، وميزة السينما ان لو فيلم في التامنينات ممكن نشوفه دلوقتي ودا يمكن بيتعمل في المسرح ولكن من كل العروض اتصورت من زمان جدا فيمكن دي الميزة ف السينما انها تقدر تقول عليها حاجه للتاريخ.

من وجهة نظرك كيف تري الفن؟

فن الستاند اب كوميدي هو فن نقد ساخر فن مش سهل خالص فن محتاج الموهبه ومحتاج ان انت تشتغل ع الموهبه دي وان انت تطورها ويكون عندك فكرة انا طول الوقت لازم اشتغل واكون احسن.

من هو مثلك الاعلي في التمثيل؟

مثلي الاعلي لو ف مصر محمود عبد العزيز الله يرحمه يحيي الفخراني خالد صالح، أما برا مصر جاك نيكلسون الراجل دا عظيم يعني.

لو اتعرض عليك دور كوميدي ف السينما هل توافق؟

طبعا هوافق ولو دور مش كوميدي برضو هوافق لان انا برضو عاوز امثل مش عاوز ستاند اب كوميدي بس.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟ 

بنبسط بدا جدا بحس ان انا تعبت ودي رزق بالا انا عملته.

 هل تهتم بالسوشيال ميديا؟

للأسف مش قوي ولكن لا عرفت قيمة السوشيال ميديا بصراحه وناوي اهتم جدا الفترة الجايه.

ماطبيعة الشخصية التي تجسدها؟

دا يتسأل أكتر لما اكون ف فيلم او مسلسل إنما الستاند اب كوميدي احنا بنطلع بالهاوية بتاعتنا احنا يعني مش بنحاول ان احنا نمثل ممكن امثل لو انا مثلا هوصف شخص اتعاملت معاه فلازم امثلك الشخص دا فممكن اقلده لكن ف العادي لما باجي اتكلم بتكلم بيل انا.

كيف تستعد للشخصية التي تجسدها في ستاند أب؟

زي ما قولتلك عن ست ما مثلا فهي مثلا الست دي محجبة والدهب مغطيها من ساسها لرأسها وبتتكلم كدا ودايما بقا في انا بقلدلك الست دي، طبعا بستعد للكاركتر دا ان انا بشوفه كويس وبركز معاه.

ما جديدك في الفتره القادمه في ستاند أب؟

هل تحدث تطورات جديده في ستاند أب؟

اه طبعا الفن بيطور جدا وانا بدأت تحب الفن دا اكتر الجديد عندي ان شاء الله في حفله هنعلن عنها وهيكون فيها ناس كتير جدا حلوة.

ما الذي تغير في شخصيتك منذ بداية مشوارك في ستاند أب؟

عاوز اقولك ان كل حفله الحمد لله بنتعلم حاجه جديده واستايل جديد في الضحك ممكن اعمل جوك اذكي او نكته اذكي ممكن مثلا يعني ف كل حفله لازم يحصل حاجه وتتعاملي معاها يعني انا النهارده كنت بتكلم عن ابويا ف المايك عمل صوت فقولت زعله وحش اووي طبعآ دا مجاش من يوم وليله مش من اول حفله بتفاعل وبرتجل مع الناس ال قاعده ف الصاله، لا طبعاً دا اخد مني وقت ومجهودوخبرة اتكونت ع مدار سنين.

ما المحطه التي تعتبرها فارقه في مشوارك رغم نجاحات الكثيره؟

المحطة الا فرقت معايا لما كوميدي سنترال جات في الوطن العربي وقالت هعمل برنامج اسمه كوميدي علي الواقف وراحت كذا دولة الأردن ولبنان والمغرب ومنهم مصر وقدم كل الناس ال بتعمل ستاند اب كوميدي مشهورين ومش مشهورين وكنا حوالي 100 واحد اختارو منهم 9 ف انا كنت واحد منهم الحمد لله وكان معايا ناس كتير مشهورين دا فرق معايا وفرحت بيها جدا وحسيت ان انا ممكن اكون شخص كويس ف المجال دا.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

طبعاً الفترة دي مكانش فيها مسرح ولا سينماومكانش فيها أي حاجه في الفترة اللي جايه هنعوض دا بس طبعا مش عارفين الدنيا ماشية اذاي كورونا راجعه مش راجعه ان شاء الله ع قد ما بنقدر هنكون بنعمل حفلات اكتر واكتر.

«وليد التركي»

ماهي بداية مشوارك في ستاند أب كوميدي؟

انا بدأت ف ورشة مع وليد ابو المجد كنت بحب المجال ومتابعه من زمان ف دخلت الورشه 2016 اتعلمت فيها كتير وعملت اول حفله ليا ف ساقية الصاوي ومن بعدها بدأت اشتغل كتير الحمد لله.

هل واجهتك صعوبات في ستاند أب؟ 

هو مافيش حاجة مافيهاش صعوبات اكيد والخطوه مكنتش سهله واكيد بيكون فيه خلافات وشوية مشاكل داخليه جوه المجال بتعطل بس الحمد لله لسه مكملين يعني.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

مبسوط جدا طبعاً وبفرح اوي ب انبساط الناس ونجاح صحابي واكيد بتكون من اسعد اللحظات اللي بمر بيها ودي مش اول مره ليا ف الساقيه لا يمكن اول مره ل ناس معانا ف الحفله بس انا وناس تانيه عملنا كتير قبل كده.

من وجهة نظرك تفضل المسرح أم السينما ولماذا؟

انا شايف ان ده حاجة وده حاجة بس ممكن اقول اني بحب المسرح عشان فيه تحدي اكتر ورد فعل الجمهور بستقبله ف نفس الوقت سواء سلبي او ايجابي وده شعور حلو يعني.

من وجهة نظرك كيف تري الفن؟

شايفه حلو جدا وممتع جدا وبجد محتاج انه ياخد حقه اكتر من كده لانه مليان مواهب بجد.

من هو مثلك الاعلي في التمثيل؟

هو انا ماليش مثل اعلى بصراحه لاني ممكن جدا اني ان شاء الله احلامي ملهاش سقف ولا حدود ولا حابب اكون شبه حد بس انا بحب احمد حلمي جدا.

لو اتعرض عليك دور كوميدي ف السينما هل توافق؟

هوافق لو كان دور كويس ومش مبتذل يعني مطلعش اهزق نفسي بشكل سخيف عشان هما شايفين ان ده كوميدي .. لا انا لو عجبني حاجة اكيد هوافق طبعاً.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

انا بفرح جدا لما بلاقي ناس عرفاني وبتحب اللي بعمله اصلا وكلهم فوق راسي والله ولو انا بفرحهم شويه هما بيفرحوني اوييي بقا بجد.

هل تهتم بالسوشيال ميديا؟

اه بحاول ابني جمهور منها طبعاً عشان ده اكيد هيوصلني ل خطوات كتيره اسرع ف اني ابين موهبتي وادينا بنحاول.

ماطبيعة الشخصية التي تجسدها؟

انا مش بجسد شخصيات هو انا بكون على طبيعتي جدا ع المسرح مش ديما الحاجات اللي بنقولها بتكون حقيقي 100% بس الغرض الاول والاخير هو الضحك وكل واحد وستايله.

كيف تستعد للشخصية التي تجسدها في ستاند أب؟

بحاول اكون هادي وتلقائي جدا مش عايز ابان مصطنع ولا سخيف وابدأ اظبط الماتريال اللي انا كاتبه واطلع اقوله زي ما انا مظبطه والباقي توفيق من عند ربنا.

ما جديدك في الفتره القادمه في ستاند أب؟ هل تحدث تطورات جديده في ستاند أب؟

الاستاند اب طبعاً بدأ يتشاف جدا الحمد لله الفتره الاخيره وبدأت ناس كتير تعرفنا وان شاء الله خلاص الفتره الجايه انا واثق ان المجال هيكون واسع ومعروف جدا وانا مكمل ان شاء الله وفي حفلات كتير قريب.

ما الذي تغير في شخصيتك منذ بداية مشوارك في ستاند أب؟

لا بصراحه اتغيرت كتير جدا بقيت جريئ وبعرف اتعامل مع الناس وبقيت اجتماعي جدا دماغي ع طول شغاله ف افكار افيهات وهكذا والحمد لله انا شايف اني بقيت احسن.

ما المحطه التي تعتبرها فارقه في مشوارك رغم نجاحات الكثيره؟

هي الاستاند اب اكتر محطه فرقت معايا ف حياتي عموماً من بداية ما عملت وفي حفلات كده بصراحه فرقت معايا جدا نفسياً وفنياً برضه زقتني خطوات قدام.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟ 

دا بيحصل فعلا وبدأنا نرجع بحفلات قويه زي حفلة النهارده ولسه ان شاء الله الجايات كتير واقوى.

«حمزه بهاء»

ماهي بداية مشوارك في ستاند أب كوميدي؟

بدأت من 2014 وكنت بدأت ب اوبن مايكس بتنزل تجرب بيبقي ليك 5 دقايق حاجه جديده بجمهور وكدا بعد كدا بدأت اتعرف ع كوميديانذ قبل مني ذي علي قنديل وصلاح الدالي وبدأت انزل معاهم حفلات وواحده واحده بقي فيه جمهور بقا فيه ناس بتحضر لنا فبقي لينا حفلاتنا الخاصه

هل واجهتك صعوبات في أستاند أب؟

الصعوبات ان الفن دا لسه مش منتشر الناس مش فاهمه احنا شعب دمه خفيف جدا فصعب تضحك حد هو فاكر انه يعرف يضحك وهو فن فردي مش مسرحية يعني كل واحد لازم ليه جمهورة الخاص وان انت تكون جمهور لوحده دا صعب جداً وكونه فن مسرحي فدايما بيبقي مكلف ومش مجزي كفلوس يعني.

شعورك أي بعد نجاحك اليوم علي مسرح ساقيه الصاوي؟وهل دي اول مره ليكم ف الساقيه؟

الحمد الله مش اول مره ليا ف الساقية احنا بنعمل فيها من 2015 الحمد لله انا بقي ليا حفله كل شهر ف الساقيه والحمد لله الساقيه لما فكرت ترجع كنت انا اول حفله تتعمل عشان هما عارفين اننا لينا جمهور يعني بعد نجاح اي حفله بركز في الحفله اللي بعدها وباقي اتعلم من اخطائي واعمل حاجه مختلفه ودائما يبقى فيه فكره جديده عشان الجمهور بيحب يكون في حاجه مختلفه في باحاول استثمر النجاح ده انه يفيد بعد كده.

من وجهة نظرك تفضل المسرح أم السينما ولماذا؟

طبعا انا بتفضل المسرح جدا هو السينما انتشار والسينما نوع مختلف عن المسرح لكن المسرح في حته كده الواحد بيحبها بيحب يسمع رد فعل الجمهور وقتي يعني.

من وجهة نظرك كيف تري الفن؟

الفن هو الشيء المبدع اللي يؤثر فيا سواء فكريا او عاطفيا.

من هو مثلك الاعلي في التمثيل؟

مثلي الأعلي ف التمثيل احمد ذكي ونور الشريف وبحب من الجيل الجديد محمد فراج ومحمد ممدوح والأستاذ يحي الفخراني.

لو اتعرض عليك دور كوميدي ف السينما هل توافق؟

اه طبعا هوافق وتبقي فرصه طبعا كبيرة جدا أن انا اثبت نفسي انا مش بستخدم الستاند اب كوميدي كمحطه عشان امثل ف السينما بس ف نفس الوقت لو جاتلي حاجه ف السينما انا هبقي مبسوط جدا ليها يعني وانا بسعي لدا.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

الناس في الاول متبقاش فاهمه الاستاند اب كوميدي بس لما بيلاقوا ان انا بقول مواضيع ونكت مختلفه وجوكس مختلفه بيقدوا يفرقوا ما بين الشخص الا بيقول نكت وافهات ع النت والماتيريال المتعوب فيه يعني.

هل تهتم بالسوشيال ميديا؟

انا بهتم بالسوشيال ميديا جدا وشايف انها مؤثرة جدا ولازم يتم استغلالها بشكل مفيد.

ماطبيعة الشخصية التي تجسدها؟

في الستاند اب كوميدي مفيش شخصية بجسدها علي قد ما اكون انا حقيقي جدا وشخصيتي انا ال علي المسرح وبتكلم عن مشاكلي وهمومي والحاجات ال بتحصلي والا مش عاجباني بكون انا يعني انا بجسد نفسي.

ما جديدك في الفتره القادمه في أستاند أب؟

هل تحدث تطورات جديده في أستاند أب؟ 

الجديد ف الفترة الجايه ان فيه بروجيكت شغال عليه بفئة مختلفه وجيل مختلف تماما وهو ان بعلم ناس ف 50 سنه الستاند اب كوميدي، وهنعمل ان شاء الله حفله بيهم اسمها ضحكت العتاقي دا حاجه جديده هتحصل وان شاء الله تطور المجال.

ما الذي تغير في شخصيتك منذ بداية مشوارك في ستاند أب؟

التغير ف شخصيتي ان اكون مركز اكتر عندي سرعه بديها لازم اكون مركز ف التفاصيل ال حواليا وأنواع الشخصيات حواليا ان انا اكون عارف كويس اووي ان انا افرق من انا بستظرف وان انا بضحك مش اي حاجه بتكلم عليها وبنتقضها لازم تكون تستحق النقض فعلا.

ما المحطه التي تعتبرها فارقه في مشوارك رغم نجاحات الكثيره؟

المحطة اللي فرقت ف مشواري شغلي ف البلاتوه كنت اول مره اكتب مع احمد امين ف ورشة كتابة بلاتوة ف برنامج كوميدي ف التلفزيون كان ع قناة النهار فدي كانت خطوة فارقه يعني.

 بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

يعني ف حاجه شغال عليها ليها علاقه بالكورونا بدون تفاصيل فيلم قصير شغال عليه بتفاصيل ال كانت بتحصل ف الكورونا.

«أحمد منصور»

ماهي بداية مشوارك في ستاند أب كوميدي؟

اول تجربة ليا مع الاستاند اب كوميدي كانت عن طريق الحزب الكوميدي ومؤسسه هاشم الجارحي في الاوبن مايك اللي بيقدموه عشان يكتشفوا المواهب الجديدة.

هل واجهتك صعوبات في ستاند أب؟

اكبر صعوبه واجهتها وبيواجهها كتير من زمايلي ان مش ناس كتير اللي تعرف فن الاستاند اب كوميدي او هو فورمات جديد عليهم ف دايما هتلاقي تعليقات من ناس يعني دي مسرحية ولا حفلة ولا ايه ومش فاهمين اوي مصطلح الاستاند اب كوميدي بس طبعا جهود زمايلي اللي سبقوني ف المجال بدأت الي حد ما نجني ثمارها في انهم عرفوا الناس بالمجال ده وبقي ليه جمهوره.

شعورك أي بعد نجاحك اليوم علي مسرح ساقيه الصاوي؟

وهل دي اول مره ليكم ف الساقيه؟ انا مبسوط جدا بالتجربة دي ويا ريت تتكرر تاني الساقية من الاماكن اللي دايما بتحتضن أنشطة فنيه من زمان ودي اول مرة ليا ف الساقية ك استاند اب كوميديان بس كان في تجارب قبل كده كتير كتمثيل.

من وجهة نظرك تفضل المسرح أم السينما ولماذا؟

المسرح حاضنة مواهب للسينما وممكن نختلف او نتفق في ده بس لازم نتفق ان الممثل اللي تأسس في المسرح بيكون اعلي بكتير من اللي عمره ما وقف علي مسرح بينما السينما هي المجال الاشمل والاوسع للفنان عشان ينتشر ويطلع مواهبه بشكل اكبر… ف الاتنين مهمين والاتنين بيكملوا بعض.

من وجهة نظرك كيف تري الفن؟

الفن مش رسالة…. الرسالة بيبقي ليها محتوي معين جواها مش بتخرج عنه انما الفن اشمل واوسع من كده بكتير وزيه زي حتة الصلصال… ممكن مره تعمل منها تمثال حلو جدا فنيا وملوش اي معني غير في جماله وممكن يتعمل منه تمثال بيقول حاجة معنويه وشكله حلو… وممكن يمسكها عيل صغير دمه خفيف يعمل منه اشكال مضحكة.

من هو مثلك الاعلي في التمثيل؟

مثلي الاعلي فنيا هو احمد امين لانه فنان شامل بيكتب وبيمثل وبيغني وبيعزف كمان واثر جدا ف شخصيتي لانه ملتزمش بسن معين يبدأ فيه يشتغل علي مستوي واسع.

لو اتعرض عليك دور كوميدي ف السينما هل توافق؟

طبعا جدا وانا بحب التمثل واتمني اشارك ادور بالسينما.

كيف تعاملت مع الجمهور وردود افعالهم سواء بالشارع او السوشيال ميديا بعد مشاهدتهم لك بهذه القصص والنكت بصورة مضحكه؟

اكيد بتبسط باي رد فعل ايجابي او اي حد يطلع مبسوط من حفلاتنا لان ده الهدف اساسا ان الناس تتبسط بحاجة انا بحب اعملها.

هل تهتم بالسوشيال ميديا؟

اكيد السوشيال ميديا هي المنفذ لاي جمهور دلوقتي ف اللي عايز ينشر الحاجة اللي هو بيقدمها لازم طبعا يهتم بالسوشيال ميديا.

كيف تستعد للشخصية التي تجسدها في ستاند اب؟

هو الاستاند اب بيعتمد علي ان الكوميديان بيحكي تجاربه هو الحياتيه او رؤيته لحاجة في المجتمع ف لازم الواحد يكون لماح جدا لكل حاجة بتحصل حواليه ومنتبه لكل المواقف اللي ممكن تشكل ماتريال يحكيه ف حفلاته فالاستعداد هنا مش بيكون بشخصية قد ما هو بيكون بتركيز وقدرة علي اني اطلع المضحك او الكوميدي في كل حاجة بتحصل حواليا.

ما الذي تغير في شخصيتك منذ بداية مشوارك في ستاند أب؟

مفيش حد بيقف علي مسرح وبيواجه جمهور الا وفي حاجة ف شخصيته وف كيانه بيتغيروا مع اول مره يقف فيها…. بيتجرا زياده ع المسرح كل مره … بيحس بالجمهور اكتر كل مره وبيبقي عارف يقف امتي ويكمل امتي…. ساعات كمان بيبقي اجرا في حياته الشخصية زي ما حصل معايا.

ما المحطه التي تعتبرها فارقه في مشوارك رغم نجاحات الكثيره؟

حفلة النهارده في ساقيه الصاوي لانها تعتبر اول مره العب استاند اب كوميدي في ساقية الصاوي اللي هي اول مكان قدم الفن ده في مصر.

بعد تأثير أزمة كورونا هل ستقدم الفترة القادمه شئ قوي يعوض فتره كورونا وازمتها؟

ان شاء الله نحاول نعوض انا وزمايلي الفترة اللي فاتت اللي الناس قعدت فيها ف بيوتها وعطشانين للخروج والمسرح والفن.

مقالات ذات صلة

زر الذهاب إلى الأعلى