تقرير

للحمايه من كورونا.. الطلاب يطالبون بإلغاء الترم التاني حفاظاً على صحتهم

تقرير: مروة بدار

يتناول الكثير من رواد مواقع التواصل الاجتماعي أخبار ومنشورات كثيرة للغاية تطالب بإلغاء الترم الثاني 2020 من الجامعات، بعد صدور قرار من فخامة الرئيس عبد الفتاح السيسي بتعليق الدراسة لمدة أسبوعين، بسبب منع تفشي فيروس كورونا المستجد، والذي كان بدايته في الصين، وحالياً بدولة إيطاليا التي سقط فيها العديد من الموتى بسبب فيروس كورونا.

حيث يذكر أن تصدر هاشتاج تحت شعار “إلغاء الترم الثاني للجامعات” أول أمس صباح الجمعة 20 مارس، موقع المدونات الإجتماعية بــ”تويتر”، بالمُطالبة من وزير التعليم العالي الدكتور خالد عبد الغفار بإلغاء الترم الثاني للجامعات حفاظاً على سلامة الطلاب.

الجدير بالذكر أن قاموا بعض الطلاب والطالبات للجامعات باستبيان مكتوب فيه “مع أم ضد إلغاء الدراسة للترم الثاني”.

حيث أشاروا بعض الطلاب والطالبات لبعضهم في بعض الجروبات الدراسية، وأقامت جروب يضم جميع الفئات سوء المعاهد الخاصة أو الجامعات لإلغاء الدراسة خوفاً من فيروس كورونا المستجد.

تستعرض إليكم جريدة صوت العرب نيوز آراء الطلاب والطالبات في إلغاء الدراسة :

وفي البداية تحدث فكري السروجي من محافظة سوهاج 21 سنة حيث قال: اكيد مع إلغاء الترم الثاني من الدراسة، صحتنا أهم من الدراسة والتعليم، فيروس كورونا وحش جداً وأصعب فيروس نواجهه حتي هذه اللحظة، لازم الدراسة تتلغي وخصوصاً بعد العدد الكبير الذي اصُيب بــ”كورونا” في إيطاليا، الفترة اللي جاية فترة خوف وسط ظروف انتشار كورونا في مصر.

كما تحدثت الطالبة بسمله علاء 19 سنة من شبرا قالت: مع إلغاء الدراسة ، طبعا عشان لو الدراسه استمرت الفيروس هينتشر اكتر وهتبقي كارثه اكبر.

وكما قالت الطالبة هيام نبيل 21 سنة من محافظة الجيزة: ضد إلغاء الدراسة، عشان احنا بندرس مقررات هنحتاجها بعد كده اما نشتغل مدرسين مينفعش ينقص منها جزء لاننا مش هنعرف نسترجعه تاني اكيد زي النحو مثلاً من ضمن المواد في كليتي.

وأضافت الطالبة أمنية محمد 20 سنة من محافظة الجيزة، حيث قالت: مع “عشان خطر علينا دلوقتي نزولنا مع انتشار الفيرس بالعدد الكبير ده” وضد “عشان مينفعش نلغي مواد علمية و نعدي تيرم كامل من غير ما ندرسة.

كما أضافت الطالبة ايمان محمد 20 سنة من محافظه الجيزة حيث قالت: مع الإلغاء طبعاً، الدنيا ليست أمنه وعدد الحالات بيزيد كل يوم ورا التاني في البلد فمينفعش نعرض الطلاب للدراسة في الفترو دي غير لو الفيرس هدي وعدد الحالات بدأ يقل، ومن رأيي أن مصلحة الشعب اهم من التعليم 100 مره، وسنه راحت هترجع تاني لكن لو شخص راح مبيرجعش ده رأيي.

وتحدثت الطالبة دينا يسري 18 سنة من محافظة القليوبية حيث قالت: مع إلغاء الدراسة طبعاً، لأن استمراراها يمكن يزود عدد المصابين بسبب التجمعات والإعداد الكتيرة سواء في الجامعات أو المدارس.

والطالبة دنيا عبد الناصر 19سنة من محافظة القليوبية تحدثت برأيها وقالت: مع إلغاء الدراسة، حفاظاً علي سلامتنا لان الأوضاع مش مستقره وحتي لو ملغوش الدراسة هنكون خايفين ننزل ونتعامل تاني زي الأول، حالة الزعر اللي الشعب وصل ليها مش هترجع طبيعية تاني غير لو سيطروا على الوضع بنسبة كبيرة تطمنا ساعتها نقدر ننزل تاني ونتعامل ونكمل دراستنا غير كده لا مع الإلغاء طبعاً.

والطالب مصطفي محمد 20سنه من محافظة الجيزة، حيث قال: مع إلغاء الدراسه، لان التجمع لو مش هيكون ف ايام الدراسة هيكون ف الامتحانات واللجان ومفيش طالب هيذاكر طول السنة وفي الامتحانات تجيله كورونا .

وأضافت الطالبة دعاء عابد 18 سنة من محافظة القليوبية حيث قالت: مع إلغاء الدراسة لان إلغاء الدراسة هيمنع نزول الطلاب وبالتالي هنقل ازدحام المواطنين في الشارع والأماكن العامة، وده أهم شئ يساعدنا اننا نحجم خطر الفيروس ونمنع حدوث كوارث بسبب انتشار الفيروس، لذلك إلغاء الدراسة من اسلم الحلول لتجنب الكثير من العوائق.

كما تحدثت ايضاً الطالبة ندي هاني 21 سنه من شبرا حيث قالت: مع إلغاء الترم الثاني اكيد، “مينفعش ننزل حرام صحتنا اهم من اي حاجة، احنا هنضمن منين لو نزلنا ميحصلش حاجة لينا واصلاً محصلش تأجيل امتحانات ولا اي حاجة دا الميعاد بتاعها اصلا، الحل إلغاء الدراسة حرصاً علي  سلامة الطلاب والأهالي كمان التاجيل دا مش حل كل الدول أجلت عشان خايفة علي شعبها احنا البلد الوحيدة اللي مش فارق معاها حاجة حرام دا”.

والطالبة منة جمال 21 سنة من محافظة الجيزة قالت: مع إلغاء الترم الثاني من الدراسة، “عشان التجمعات والزحمه، واحنا مش بنفهم شرح المحاضرات عن بـُعد”.

وذكرت الطالبه داليا عاشور 20 سنة من محافظة القاهرة حيث قالت:  مع إلغاء الترم الثاني من الدراسة، “عشان بالعربي كدا يعني نمتحن ازاي في تجمعات ونص محاضرات مخدنهاش يعني والمجمع لوحدو بيلم الآلاف الطلبة، ازاي كل دا يمتحن ومناهج ومقرارات تقيله والاونلاين دا ملوش لازمه، حرام”.

والطالبة سارة يحيي محمد 20 سنة من القاهرة حيث قالت: مع إلغاء الدراسة، للحد من انتشار الفيروس اكتر من كدا.

وذكرت الطالبة مريم فريد 20 سنة من محافظةالقاهرة وقالت: مع إلغاء الترم الثاني من الدراسة، ” عشان مش عايزة اموت يعني انا واحدة مناعتي زي الزفت من ساعة ما المرض دخل مصر وانا في بيتي بقالي اكتر من اسبوعين مش مستعده اتعب”.

كما أضافت سهام محمد 20 سنة من محافظة القاهرة حيث قالت: مع إلغاء الترم الثاني من الدراسة، “عشان احنا حياتنا مش رخيصه عشان تضيعها بالشكل ده مينفعش نخرج احنا كدة بنأذي نفسنا”.

وتحدثت الطالبة مريم محسن 21 سنة من محافظة الجيزة  وقالت: مع إلغاء الترم الثاني من الدراسة، “عشان مش هنلحق نخلص المناهج ومحدش عارف الفترة دي هتخلص أمتي ولا المرض هيوصل لفين و مفيش ظروف تهيئ لحد الدراسة”.

والطالبة ايمان جمال19 سنة من محافظة البحيرة حيث قالت: مع إلغاء الترم الثاني حفاظاً علي نفسنا.

وبالسؤال للطالبة سارة ياسر، 20 سنة من محافظة الجيزة، قالت: مع إلغاء الترم الثاني من الدراسة، “عشان الناس بتنزل ومحدش فارق معاه حاجة وبتلمس الحاجة و الناس بتموت”.

والطالبة تسنيم خالد 22 سنه من محافظة الجيزة،  قالت:  مع إلغاء الترم الثاني من الدراسة، السبب ان فعلا مينفعش ف الأجواء والأحوال المنتشره الخاصه بالفيرس واللي هو اصلاً ممنوع النزول او التجمعات، والدراسة ازاي عملو مواقع بطيئة ومش بتشتغل عن الكل يعني متابعة الدراسة مش موجودة ده أولاً، وثانياً اوقات الامتحان هنمتحن ازاي وهو اصلاً مينفعش تجمعات والموضوع بتاع الفيرس مش بيهدي بالعكس الحالات بتسوئ جداُ، في من رأيي أن لا الدراسة تتلغي افضل.

وأضاف الطالب أحمد محمد 20سنه من محافظة القاهره حيث قال: مع إلغاء الدراسه، لأن بما أن في مرض ف البلد دلوقتي ليس له علاج و من الصعب التفريق بينه و بين انفلونزا البرد العاديه و أنه مرض سهل الانتشار و أنه كمان بتختلف الأعراض من شخص ل شخص آخر .. ف هيبقي خطر جدا وجود تجمعات بأرقام كبيره جدا من الطلاب داخل الجامعات و المدارس ولو أحد اتصاب لقدر الله و دخل وسط التجمعات دي هيبقي خطر جدا علي الدوله و الشعب.

و تداول بعض الطلاب هشتاج يطالبون فيه بإلغاء الترم الثاني:

 #حق_طلاب_الجامعات_فين

#الغاء_الترم_التاني_للجامعات

#صحتنا_اهم_من_التعليم

#نجاح_جميع_الطلاب

#الاونلاين_مينفعش_معانا

#جامعات_مصر

#إيطاليا

#خليك_في_بيتك

#فيروس_كورونا

#STAY_AT_HOME

#STAY_SAFE

#CORONA_VIRUS

#cancel_the_second_term

#cancel_the_second_smester

#our_life_is_most_important_from_education

و لكن في النهاية نتمنى تحقيق الصالح العام للدولة.

 

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق